THUPI: NA INSUNG DAM HINAM 2Kings 4:26; Ish 38:1

Pathenin houbung, school le government um masangin eden hon munna insung anasem tan ahi.

Tulaihin inhoi, inpha neidohna din habol in akiki bollin, hinlah insung kitipa hi gelkhohna alhom tai kitile kisei khielou maithei ahi. 

Khangthah atamjon insung kiti hi gena, von kikhelna, kinahna le umjapna dingin bou gel atam tan ahi. Miching kon khatnin Insung kitihi leiset chunga university phapen le athupipen ahi atiji paohi umdoh theilou bangin akimujin ahi.  

1. MI PA LE MINU NADAM LHON HINAM?: (Vs. 26a).

Pathen thun eidoh nom masah pennu chu minu mipa nadam hinam? Insunga amopo teni nadam lhon hinam? Insunga hi minu le mipa um masa ahijeh in minu le mipa hi tahsa (physically), lhagao (Spiritually), lungthim (psychologically), lungel (mentally), le jalhang (Socially) a a-dam lhon ding athupi in ahi. Ipijeh a houbung, society kitup jilou ham itile insung kituplou tamjeh hithei ahi. Russia le Chinese scholar hon communist semphat na dinga research abolnaova chun society akitupna dingin amasa insung akitup angai dan amudoh un ahi. Hijeh chun tuni hin i insung damma hinam?

2. CHATE DAM HINAM? (Vs. 6b).

Ps. Sunpa chun chate hi Pathen na konna ahi ati (Ps.127:3). Chate chu Pathen toh kinaijing diu tina jong ahi. Chate hi lhagao le tahsa a adam theina diupen hi Pathen toh kinaijinga aum diu hi ahi. Hinlah minu le mipa tampi hin Pathen toh akinai nadiu lampi khahtanna pang thei ihiuve. (Luke 18:16-17) Gospel lang chu ivetle chapangho Jesu henga ahinpuiju chun seijuiten ana jahda uve, ajeh chu Jesu dinga chapang te chu athupilouva seijuiten anagel u ahi. Insung le society ajong chapang tehi athupilou, donlou, vetuplou, gelkhohlou vin akikoi theiji-e. Seijui te dinmun chu nu le pa dinmun hisahleu hen ichate ho Jesu toh akihetmat to nadiu sutanga pang thei ihidannu akilange. Jesun vang chapangte chu athupipen, akhohpen amasapenin akoi dan thu ahillin ahi. 

Pathen lengam thuhi chapan laija ahetchenuva, akisan chehu ngai ahi dan jong muthei ahi.

Insung kiti chu lhamonna mun hiding,  school banga hinkho mandidan kihilna mun hiding, Houin banga Pathen thu kihilna mun hiding, factory ho banga insunga neh le don ngaichat konkhatho semkhom jina mun hiding ahi. 

3. NGAILUT:

Christian Insung dihtah aumdoh theina din amasa penna mi nu mi pa le chaten aneidiu chu ngailutna ahi. Pathen chu angailut ahi banga, Insunga chengkhom ho chu kingailu diu ahi. Ngailut hi tonsot thil ahijeh in insunga cheng jouse  ngailut aneitei diuva khoh ahi.

4. CHATE KHOUKHAH DING:

Isaiah Themgao chun Hezekiah lengpa kom chun na insung kisem tup tan atin ahi. (Ish 38:1). Insung pha ahungsodoh theina din, jenei tah a kihilna le kikhounkhahna insunga aum angaijin ahi. Iti khou khah di ham iti le LUNGLUT  MONG MONGA khoukhah ding dol ahi (Deuteronomy 6:7). Hijeh chun chate hi insunga chapa/chanu pha hina lampi hil ding, jalhanga citizenship pha sosah got ding, houbung sunga dinga chapang pha, ng/gl pha lampi hilding, Jesu christa nungjui pha ahung hi teina diuva lampi pha vetsah ding. 

5. VETSUI THEIJA UMDING:

Chapang hohin leture bol kihilna sangin, amuva, avethouva konin thil  ahe thei jouvin ahi. Chep le mom nehlou ding itiuvin, eiho nehlouva ium-u hinam, hongphal ding thu ihil jiuva ahija amudiuva hongphal ibol u um hinam? Kitah ding iha hillun eiho a kitahna amu hinam? Pathenin itaonao asang jing ding ahi itipehuvo khatveibeh idilsuhuva Pathen henga itao khah u hinam? Bible hi Pathen thu itipeh jinguva, khatveibeh Bible isim amu khah nahuvam? 

John Wesley chun,  Christian chonchan pha hi England gamsunga theologian ho lah a sangin kanu a konin kaha mu tam jon ahi ati.

Dl Moddy Pathen thusei minthang khat chun Ka insunga kanu tobang hi minute hichehle leiset chungah jail kiti hi aum ngaiponte atin ahi.

Shaping nuggets of Gold