PENTECOST SUNDAY (2019) NILHAH KAIKHOM, CHT SONGPIJANG (7:00 PM)

 LHAGAO LAM JOTNA (2PETER 1:5-7)

Christian khat chu houin kai, tao jing, seminar le kisuhhalna jatchom choma pang ihi cheh maitheiju ahi. Ahin hiche ho a konna chu nangman ichanna nalhagao hinkho a khantouna nanei hinam? Penthah channa hi kichaija igelam? Tuni a ithupi uhin, Lhagao hinkho lamma i-khantou theina diuva kalbi sagi  iseikhom diu ahi.

Amasan, kalbi sagi isei masanguvin, thilni iseidoh masa nomuvin, akhatna, Lhagao Theng hi tonsotna umjing, thiljouse he, munjouse a um ahi ITAHSAN angaije. Chule Kalbi sagi ho kaltheina dingin PONTHONA inei angaijin ahi. Christian hinkho a thaset kiti hin mun aneipoi ti hejingin.

Kalbi Khatna: Phatna/Goodness vs.5a:

Peter in phatna atihi mopohna khat kipe ajona channa hoikeicha tongjouho kiseina ahi. Christian khat chu Pathenin akouna banga hinkho amanlhungna chu phatna kiseina ahi. Hinkho lampi jouse a phatna pohdoh ding tina ahi. Doctor, nurse, officer, teacher, business, loubol chule simlai ho hiche phatna hi aneicheh diu tina ahi.

Kalbi Nina: Hetna/Knowledge vs 5b:

Bible in hetna ati teng mohhetmai hilouva, het na tohdoh tho theiho aseina ahi. Christian khatnin hetna sangpenna agel ding chu Pathen thu sim jinga he a, jui jing ding hi ahi. Tunin ikidoh nom khat chu, bible thumvei beh, nivei beh, aloule khatvei beh nasim chai khahtah em? Hetna tampi umjongle Pathen thu hetna hi Christian ten lhagao hinkho a khantouna dinga khohpen  khat ahi.

Kalbi Thumna: Kitim Them/Self-Control vs 6a:

2Timothy 1:7 chun Lhagao Theng kipehna lo hi kitim themna ding ahi tin aseijin ahi. Eima tahsa chunga discipline neitah a hinkho manthei ding tina ahi. Lungthim athenge ti a inop nop bol chu kitim them hilou ahi. Peter in aseihi kitim themna hi, ihina, lungel, umchan, sinsah, neh le don chule ilungthima kitim themna neiho aseina ahi.

Kalbi Lina: Thohhatna/ Perseverance vs. 6b: 

Thohhatna hi eihatmo sah diuho, patep nale lhepnaho josoh ding tina ahi. Vangsetna ito jing laija jong mano nom jingna lungput neiding tina ahi. Pohgihtah eikisempeh nunga jong lungneng tah a pang kutkut jeng tina ahi. Thohhatna ding khat chu taona ahi. Lo lhinna ding, insung mi ding, heng le kom ding, loi le gol dinga nikhat hilou, lhakhat hilou, kum khat hilou, akum akumma lung lha louva thohhatah a taona neinom jing ding tina ahi. 

Kalbi Ngana: Pathen Ngaisahna/ Godliness vs.6c;

Inun chan jouse a Pathen hina thodoh got ding tina ahi. Loi le pai toh kiguijop hoina sem ding, iheng ikom toh  kichamdel a umkhom thei ding tina ahi. Tobang mi chu aumna chanin gimnam tui bangin aheng akom dingin aum theijin ahi.

Kalbi Gupna; Kisopi Ngailut/ Brotherly Love vs 7a:

Heng le kom dinga lunggel them tah a hinkho man ding tina ahi. Jesu christa jalla midangtoh kivopma, kingailuto ding tina ahi. Adeh a itahsan chankhompi hotoh Pathen lenggam natohna a panlah khom nom jingna lungthim neiding tina ahi.

Kalbi Sagina. Pathen Ngailutna/Agape Love vs. 7b: 

Pathen ngailutna hi Christian jousen a neicheh tei ding kitina ahi. Hiche ngailutna hi itahsan khompi lele hitalouva hou dang, jat dang ho geija ngailutna lhingsetna vet thei ding tina ahi. Jesun nasamse teu phathei boh un, nasugenthei ho dingin taona mangun, chule Jesun cross chunga amelma ho dinga atao chun Pa athilbolu hi ahetlouvu ahi ngaidamin ati tobang hina kiseina ahi.

Golseh a pangho khun nikhat, lhakhat exercise boljeh a kipahman asannu hilou ahi, lhatampi, kum tampi akithem chuh jouvuva bou kipahman asanjiu ahi. Chunga lhagao hinkho a khantouna aum theina dinga kalbi sagi hojong hi nikhat nini a umthei ding ahipoi, pontho tah le tahsan na neitah a alha alha, akum akumma palah jouteng lebou umthei ding ahi. Apang kutkut hobou chu khangtou diu tina ahi.

Hiche kalbi sagi neiho le neilouho hina chomchan vekitnute.
Aneiho chu,
1. Manchah thei hidiu,
2. Hinkho a gapha anei diu,
3.Tahsan thei ahijehuva Phatheina chang diu,
4. Puncha tah a hinkho aman diu ahi.

Hiche neilouho vang chu,
1.Lhagaova mitcho hidiu,
2. Ama phatlai lele gelkhoh Christian hinkho mang hidiu,
3. Tahsan thi hidiu ahi.

AMEN