THINA HI AJONA AHIPOI (Gen. 23:1-4; Matt. 5:4)

Thumakai: Thina kitihi athipa/athinu dinga Galjona ahi kitijongle adam nalaiho dingin thina hi ajona ahipoi. Tuni a I-Insunguvah inu le ipaovin eidalhah uhi kumlhingset nung sanga eidalhah u ahijeh in, khatvei dinga khang kikhelna le khangthah kipatkitna nikho ahitai, adeh a insung mite dingin. Hijeh chun tuni phatna igel khom diule ikidoh nomu chu thina kitihi ajona himong nam? Adamnalai ho dinga imopohna umam? tihi ikidoh nomule iseidoh nomu ahi. 

1. PULDOU DING IHIUVE

Sarah athi chun Abraham in a pul adouvin ahi. Lazarus a thi chun Mary in apul ana douvin ahi. Bible hin thina jeh a puldou veltampi akimun ahi. Abang nisagi, hapta khat, lhasagi, kum khat geijin pulthoh anaumin ahi. Jew te dingin puldou hi chena lhongpi khat ana hin chule mihem jousen thina chunga puldou hi akinei cheh in ahi. Ahin Jesun Matt 5: 4 na a chun pulthoh a lhase ho anunom ahiuve ajeh chu amaho lungmonga umdiu ahi ati. Tuni a inu le ipa vin eidalhahuva apul idouvu hi khonunga eihon Pathen a konna lhamonna dihtah einei theijohna diu ahi hi Bible a Jesun eiseipeh nomu ahi. 

2. PULDOU NA A KONNA ITHODOH NGAI AHI.

Abraham chun Sarah pul adou den pon ahi. Apul adou jou phatnin akipatdoh in Sarah vuina ding lhan hollin ache len ahi. Phatsot tahtah athiho pul dou hi Bible thuhil tojong kikal ahi. Tunihin Damma i-kivuidoh theija, houbung mile khousung veng sungin eilhamonnao jouva konna hi puldou lungput idalhah got diu ngai ahi. Puldouna a konna chu ithodoh ngaija ahi. Pul douding ahin, hinlah hinkho jong ache jom jing angaijong geltha angaijin ahi. Inu leh ipa hin hinkho lhingset eimankhom piuvin, Cha le nao tu le cha jong tampi aneiman lhonin aumkhompi man lhonin ahi. Ahinkho lhonnah tohdoh le boldoh jong tampi aneilhonin: Tahsa lammah kho jong asemdoh lhonin, atute gei school kaina agonpeh lhonin; Lhagao lamin revival sangtah ana changel lhonin, ipao hin agam agammah Pathen thu ah ana kalsongin, ahatmo nung geijin jong revival le halna angaisang behseh jeh in Revival ana ching tup jing Christa houbung thengah a athini changeijin ana umin ahi. Hijeh chun tahsa le lhagao lammah vang pilhingset hinkho eimankhompiuva eidalhah u ahi. Hijeh chun tuni hin amani pul douden louva, thil chesaho gella lunghanna, kisih a um sanga iumnaova konna thoudoh a hinkho maban somjo dingin ikitemuvin ahi. 

3. PATHEN THUTEP EIMA A SUHBULHITNA DINGA HINKHO ACHEJOM JING NGAI AHI

Ajona in Sarah thi hin Abraham chunga Pathen thutep suhbulhitnan aum tai. Pathenin Abraham chu Ur dalha a Canaan jon dingin anasollin ahi, hiche munna chu gam apeh a, chilhah tampi apeh din jong thutep aneijin ahi. Hinlah Canaan gamma kum somnga (50yr) lang cheng ahitan, Abraham hin gampheng neocha jong ama minna aneinai pon ahi. Nei le gou tampi, kelngoi le bong anei vangin gam pheng kivuina ding jeng jong aneilou ahi. Hinlah Sarah athi a pul adoujou hin Canaan gammah gampheng ajinu kivuina ding kham ahin kichodoh tan ahi. Sarah ana thijeh in Abraham in gamchohdoh nan aneijin, tunin Abraham son le pah ten hiche gam chu chen a ahin neidennun, Pathen thutep suhbulhitna ahung pangtai. Tunin jong Israel gam neitu in apang jingun Israel jong ading jing jeng nalaijin ahi. Sarah khang akichai tan, hinlah Abraham in atohban atoh dingho atong jomin, ason apah te dingin hinkho malam ding asempeh peh in ahi. Hijeh chun Thina kiti hi ajona ahipoi, ahing adam cheng dinga kithalah kitna le athiho tohbang khai tong jom dinga hing ihiuve. Tuni a inu ule ipa vin eidalhah nao hi eiho jouse ihin jom theijoh nadiu ahi. Amaho thina hin eiho chunga Pathenin thilgon suhbulhitna ding joh ahi. 

Hijeh chun amani bangin hinkho kicheh mangu hitin, Achate, atute jong pilhing cheh le khohe thei cheh ihitaovin, amani nung ijui jom diule tunihin kipannu hite tihi katilkhounanom ahi. Amen.